චීනයේ බීජිං අගනුවර පිහිටි Xinfadi නම් වූ තොග වෙළඳ සංකීර්ණය ආශ්‍රිතව නව කොරෝනා වෛරස පොකුර ඇතිවීම හේතුවෙන් එම වෙළද සංකීර්ණය සම්පුර්ණයෙන් වසා දැමීමට චීන බලධාරීන් පියවර ගෙන ඇත.

මෙම වෙළද සංකීර්ණය ආශ්‍රිතව පුද්ගලයින් 517 දෙනෙකුගේ සිදුකළ කොරෝනා වෛද්‍ය පරීක්ෂණවලින් මේ වන විට වෛරසය ආසාදනය වූ රෝගීන් 45 දෙනෙක් වාර්තා වී ඇත.

මිට දින දෙකකට පමණ ඉහතදී වාර්තා වූ කොරෝනා ආසදිතයෙක්ගේ සංචාරණ ඉතිහාසය පිළිබදව විමසීමේදී ඔහු ඊට සතියකට ඉහතදී Xinfadi තොග වෙළද සංකීර්ණයට සිය නිවසේ අත්‍යාවශ්‍ය භාණ්ඩ මිලදී ගැනීමට ගොස් ඇති බවට හෙළිවී ඇත.

ඒ අනුව සිදුකළ PCR පරීක්ෂණ වලදී එම වෙළද සංකීර්ණයේ සේවකයින් කිහිප දෙනෙකුටම කොරෝනා වෛරසය ආසාදනය වී ඇති බවට හෙළිවී ඇත.

මේ සමගම නැවත වරක් කොරෝනා වෛරසයේ දෙවන රැල්ලක් බීජිං අගනුවර ආශ්‍රිතව නිර්මාණය වීමේ අවධානමක් මතුවීම හේතුවෙන් දකුණු දිග බිජිං හි පිහිටි Fengtai දිස්ත්‍රික්කයේ ප්‍රදේශ රැසක් අගුළු දැමීමට බලධාරීන් පියවර ගෙන ඇත.

බිජිං අගනුවර වෙසෙන ජනතාවගේ සියයට 80 කට අවශ්‍ය එළවලු, මස්, මාළු ඇතුළු සියලු අත්‍යවශ්‍ය ද්‍රව්‍ය සැපයීම සිදුවන්නේ Xinfadi වෙළද සංකීර්ණය හරහා බැවින් ඇතිවී තිබෙන තත්ත්වය සුළුපටු ලෙස සැලකීමට අදහස් නොකරන බව එරට සෞඛ්‍ය බලධාරීහු පෙන්වා දෙති.

මේ අතර Xinfadi වෙළඳ සංකීර්ණය ආශ්‍රිතව සිටින පුද්ගලයින් දසදහසකගේ කොරෝනා වෛද්‍ය පරීක්ෂණ සිදුකිරීමට චීන සෞඛ්‍ය බලධාරීන් පියවර ගෙන ඇත.

මේ වන විට දකුණු දිග බිජිං හි Fengtai දිස්ත්‍රික්කය ආශ්‍රිතව දැඩි ආරක්ෂිත වැඩපිළිවළක් ක්‍රියාත්මක කර ඇති අතර එහි පදිංචිකරුවන්ට වෙනත් ප්‍රදේශ වෙත ගමන් කිරීමද තහනම් කර ඇත.