කොරෝනා වෛරසයට එරෙහිව එන්නතක් නිපද වූ පමණින් අමෙරිකාවේ වසංගත තත්ත්වය පාලනය කළ නොහැකි බව එරට වසංගත විද්‍යා ප්‍රධානියෙකු වන වෛද්‍ය ඇන්තනී ෆෝචි පවසයි.

ඊට හේතු ලෙසින් ඔහු පෙන්වා දෙන්නේ, බහුතර අමෙරිකානුවන් කොවිඩ් එන්නත් ලබාගැනිම ප්‍රතික්ෂේප කිරීම බව ඔහු පැවසීය.

මේ අතර යළි විවෘත කිරීමට යෝජිතව තිබූ එරට ප්‍රාන්ත රැසක් නැවතත් එම විවෘත කිරීමේ සැලසුම් හකුලාගෙන තිබේ.

ඒ, රට පුරා නැවතත් වේගයෙන් කොවිඩ් ආසාදිතයින් හඳුනාගැනීමත් සමගින්ය.

අමෙරිකාවේ කොවිඩ් ආසාදිතයින් 2,685,000 ඉක්මවා ඇති අතර සමස්ත මරණ ගණන 128,777 කි.

මේ අතර ගතවූ දිනයේදීත් වැඩිම කොවිඩ් මරණ වාර්තා වූයේ බ්‍රසීලයෙනි. එය 727කි.

බ්‍රසීලයේ සමස්ත ආසාදිතයින් ගණන ලක්ෂ 13 ඉක්මවා ඇති බව විදෙස් මාධ්‍ය වාර්තා කරයි.