හානි කරන ලද, විකෘති කරන ලද සහ වෙනස් කරන ලද මුදල් නෝට්ටු හුවමාරු කර ගැනීමට ශ්‍රී ලංකා මහ බැංකුව ලබාදුන් කාලය ලබන 31 වැනිදායින් අවසන් වන බව මහ බැංකුව පවසයි.

මෙවැනි මුදල් නෝට්ටු ළඟම ඇති බැංකුව වෙත ගොස් වහාම හුවමාරු කරගන්න ලෙස මහ බැංකුව ජනතාවගෙන් ඉල්ලීමක් කරයි.

ලබන සිකුරාදා (30) බැංකු නිවාඩු දිනයක් බැවින් අද (28) සහ හෙට (29) යන දින දෙකේදී මෙම මුදල් බැංකු වෙත භාරදීමට අවස්ථාව තිබෙන බව මහ බැංකුව සඳහන් කරයි.

විකෘති කරන ලද සහ වෙනස් කරන ලද මුදල් නෝට්ටු හුවමාරු කර ගැනීම සඳහා අවසන් දිනය ලෙස ශ්‍රී ලංකා මහ බැංකුව ඉකුත් වසරේ දෙසැම්බර් 31 වැනි දා කාලය ලබා දී තිබුණි.

එහෙත් ජනතාවගේ ඉල්ලීමට අනුව එම කාලය මාස තුනකින් දීර්ඝ කිරීමට මහ බැංකුව පියවර ගත් අතර මේ මස 31 වැනිදායින් එය අවසන් වේ.

ව්‍යවහාර මුදල් නෝට්ටු විකෘති කිරීම, වෙනස් කිරීම හෝ හානි කිරීම 1949 අංක 58 දරන මුදල් නීති පනත යටතේ වරදක් බව පෙන්වා දෙන මහ බැංකුව මුදල් නෝට්ටුවලට හානි කිරීම දඬුවම් ලැබිය හැකි වරදක් බව පෙන්වා දෙයි.