ලෙබනනයේ බේරූට් අගනුවර පිහිටි වරාය තුල පිහිටි පුපුරණ ද්‍රව්‍ය අඩංගු ගබඩාවක සිදුවූ පිපිරීමෙන් මේ දක්වා පුද්ගලයින් 10 දෙනෙකු මියගොස් තවත් සිය ගණනකට අධික පිරිසක් තුවාල ලබා ඇති බව විදෙස් මාධ්‍ය වාර්තා කරයි.

මේ වන විටත් පිපිරිම සිදුවූ ස්ථානයේ විශාල ගින්නක් හටගෙන ඇති බවත් තුවාලකරුවන් සහ මියගිය පුද්ගලයින්ගේ සිරුරූ සොයා සහන සේවකයින් මෙහෙයුම් ක්‍රියාත්මක කර ඇති බව ලෙබනනයේ සෞඛ්‍ය අමාත්‍යවරයා සඳහන් කර සිටියි.

එරට වේලාවෙන් අද සවස 6.30 ට පමණ මෙම පිපිරිම සිදුව ඇති අතර පිපිරීමේ කම්පනය කිලෝමීටර් සියගණනක් දුරට විහිදී ගොස් ඇති බව විදෙස් මාධ්‍ය වාර්තා කරයි.

පිපිරීමේ ප්‍රබලත්වයත් සමග ඇතිවූ කම්පනය හේතුවෙන් කිලෝමීටර් ගණනාවක් දුරින් පිහිටි ගොඩනැගිලි හා නිවාසවල විදුරු ආදිය බිඳී ගොස් ඇති අතර ඒ හේතුවෙන් පුද්ගලයින් රැසක් තුවාල ලබා ඇත.

නිවේදනයක් නිකුත් කරමින් ඊශ්‍රායලය සඳහන් කර සිටියේ මෙම පිපිරීම සම්බන්ධයෙන් තමන්ගේ කිසිදු සම්බන්ධයක් නොමැති බවයි.

මූලාශ්‍ර – www.rt.com/news