දේශීය පුවත්

විධායක ජනාධිපති ධුරය අහෝසි කිරීමේ ව්‍යවස්ථා සංශෝධනයක් ගෙන ඒමට ජවිපෙ සූදානම් වන්නේ ආණ්ඩුවේ පැටව් ගහන අර්බුදය සමනය කර ඒකාබද්ධය ඇතුළු සැබෑ විපක්‍ෂය තුළ අර්බුද නිර්මාණය කිරීම, බෙදුම්වාදය ශක්තිමත් කිරීම හා එම යෝජනාව පාර්ලිමේන්තුව තුළ සම්මත කර ගැනීමට නොහැකි වුවහොත් එම ‘සටන්පාඨය’ යටතේ යළිත් හංස පූට්ටුවකින් රටම වනසන ජනාධිපතිවරණ පොදු අපේක්ෂකයකු ගෙන ඒම යන පටු අරමුණු තුන ඉටු කර ගැනීම බව ජාතික නිදහස් පෙරමුණ පෙන්වා දෙයි.

අද (22) පිටකෝට්ටේ පිහිටි ජාතික නිදහස් පෙරමුණේ ප‍්‍රධාන කාර්යාලයේ පැවැති මාධ්‍ය හමුවේදී එහි ප‍්‍රචාරක ලේකම් මොහොමඞ් මුසම්මිල් එසේ පෙන්වා දුන්නේය.

එහි දී වැඩිදුරටත් අදහස් දැක්වූ ඒ මහතා මෙසේ ද සඳහන් කළේය.

‘‘මේ රූකඩ ආණ්ඩුවට අවුරුදු තුන හමාරක් පමණ වන විට ‘විධායක ජනාධිපති ක‍්‍රමය අහෝසි කිරීම’ නමැති පරණ, පුස් කාපු යෝජනාව රට තුළ සංවාදයට භාජනය කිරීමට ජනතා විමුක්ති පෙරමුණට උවමනා වී ඇත්තේ ඇයි? රටටත් ජනතාවටත් හතුරු, බටහිරට – ඉන්දියාවට- දෙමළ ඩයස්පෝරාවට මිතුරු පටු අරමුණු තුනක් ඉටු කර දීමටයි ඔවුන් මෙම යෝජනාව රැුගෙන එන්නේ.

‘අත්සුනු මල්ලට වැදුණු නාගයෙක්’

මේ අණ්ඩුවේ ප‍්‍රධාන පාර්ශ්වකරුවන් දෙදෙනා වන එක්සත් ජාතික පක්‍ෂයේ සහ ශ‍්‍රී ලංකා නිදහස් පක්‍ෂයේ අර්බුද මේ වන පැටව් ගසමින් තිබෙනවා. ඒ අර්බුද සමනය කර සැබෑ විපක්‍ෂය වන ඒකාබද්ධ විපක්‍ෂය භේදබින්න කිරීම ජ.වි.පෙ. පළමු අරමුණයි. දුර්වල ආණ්ඩුව තමන්ගේ ප‍්‍රශ්න විසඳා ගන්නාතෙක් විපක්‍ෂය තුළට මෙවැනි සංවාදඞීලී මාතෘකාවක් ගෙනල්ලා එහි එකමුතු බව බිඳලා ආණ්ඩුවේ ඉදිරි ගමන ශක්තිමත් කරන්නයි ජ.වි.පෙ. මේ මොහොතේ සූදානම් වෙන්නේ. ඒ නිසා ඒකාබද්ධ විපක්‍ෂය ඇතුළු සැබෑ විපක්‍ෂය ජවිපෙ ඒ පටු අරමුණ ඉතා හොඳින් තේරුම් ගත යුතුයි. ‘අත්සුනු මල්ලට වැදුණු නාගයා’ වගේ මේ යෝජනාවට සැබෑ විපක්‍ෂය දුර්වල කිරීමට පුළුවන්.

‘විධායක ජනාධිපති ක‍්‍රමය අහෝසි කිරීමේ යෝජනාව’ ගෙන ඒමෙන් ජවිපෙ ඉටු කර ගන්නා දෙවන අරමුණ කුමක්ද? කියා අපි බලමු. බටහිර බලවතුන්, ඉන්දියාව හා දෙමළ ඩයස්පෝරාව මහින්ද රාජපක්‍ෂ පාලනය අවසන් කර මේ රූකඩ පාලනය ගෙන ආවේ ශ‍්‍රී ලංකාව තුළ බෙදුම්වාදය තව පිමි ගණනාවකින් ඉදිරියට ගෙන යාමටයි. බෙදුම්වාදීන්ට අවශ්‍ය වූ මූලික කාරණයක් තමයි, ශ‍්‍රී ලංකා ආරක්‍ෂක හමුදාවන් දුර්මුඛ කර, දුර්වල කිරීම. ඔවුන් ජිනීවා මානව හිමිකම් කවුන්සිලය මගින් ශ‍්‍රී ලංකාවට එරෙහි යෝජනාවක් මේ ආණ්ඩුවේ සම අනුග‍්‍රාහකත්වයෙන් සම්මත කර ගත්තේ ඒකටයි. ඒ හරහා අද වන විට අතුරුදහන් වූවන් පිළිබඳ කාර්යාලය පිහිටුවා, බලහත්කාරයෙන් අතුරුදහන් කිරීම් වැළැක්වීමේ ජාත්‍යන්තර ප‍්‍රඥප්තිය ශ‍්‍රී ලංකාව තුළ බලාත්මක කර අවසන්. රණවිරු දඩයමට අවශ්‍ය යාන්ත‍්‍රණය අද මේ ආණ්ඩුව හදලා දිලා ඉවරයි. දැන් බෙදුම්වාදීන්ට ඉටුකර ගැනීමට ඇත්තේ 13 වැනි ආණ්ඩුක‍්‍රම ව්‍යවස්ථා සංශෝධනය පූර්ණ වශයෙන් බලාත්මක කර ගැනීමයි. එමගින් ශ‍්‍රී ලංකාව තුළ ෆෙඩරල් රාජ්‍යයක් ස්ථාපිත කර ගැනීමයි. අපි දන්නවා, ජේ.ආර්. ජයවර්ධනගේ අත කරකවලා තමයි එදා 1987 දී ඉන්දියාව මේ 13 වැනි ව්‍යවස්ථා සංශෝධනය අපේ ආණ්ඩුක‍්‍රම ව්‍යවස්ථාවට ඇතුළත් කර වූයේ. මේ 13 වැනි ව්‍යවස්ථා සංශෝධනයත් සම`ග මධ්‍යම ආණ්ඩුව හා පළාත් ආණ්ඩු අතර ඕනෑම මොහොතක ගැටුම් ඇති විය හැකියි. ඒ ගැටුම් තුළින් වෙනම රාජ්‍යයක් කරා යාමේ විභවයක් බෙදුම්වාදීන්ට ලැබී තිබෙනවා.

නමුත් 13 වැනි ව්‍යවස්ථා සංශෝධනය පූර්ණ වශයෙන් බලාත්මක වීම නතර වී ඇත්තේ වත්මන් ආණ්ඩුක‍්‍රම ව්‍යවස්ථාව මගින් විධායක ජනාධිපති ධුරයට ලබා දී ඇති බලතල නිසයි. විධායක ජනාධිපතිවරයාට පළාත් සභා පාලනය කෙරෙහි ඇති බලතල නැතිනම් පහසුවෙන් අභ්‍යන්තර ස්වයං පාලනයක් සහිත පළාත් ආණ්ඩුවක් පිහිටුවිය හැකියි. දැන් ජවිපෙ හදන්නේ විධායක ජනාධිපති ක‍්‍රමය අහෝසි කර 13 වැනි ආණ්ඩුක‍්‍රම ව්‍යවස්ථා සංශෙෘ්ධනය පූර්ණ වශයෙන් බලාත්මක කෙරෙන තත්වයක් බෙදුම්වාදීන්ට හදලා දෙන්නයි. ඒ තමයි ජවිපෙ දෙවැනි අරමුණ. 13 වැනි ආණ්ඩුක‍්‍රම ව්‍යවස්ථා සංශෝධනය එලෙසම තිබියදී විධායක ජනාධිපති ධුරය අහෝසි කරනවා කියන්නේ රටේ ඒකීයභාවය අහෝසි කරනවා කියන එකයි.

‘60,000ක් දිවි පිදුවේ මේ ටික කරන්න ද?’

එදා ඉන්දු – ලංකා ගිවිසුම අත්සන් කර 13 වැනි ආණ්ඩුක‍්‍රම ව්‍යවස්ථා සංශෝධනය ගෙනවිත් පළාත් සභා පිහිටුවා රටේ ඒකීයභාවය අහිමි කරනවාට විරුද්ධව ජවිපෙ ජනතාව පෙළ ගැස්වූවා. ඒ අරගලයේදී 60,000ක් තරුණ තරුණියන් දිවි පිදුවා. ඒ 60,000ක් මළ කඳන් මැද්දේ සම්මත කර ගත් 13 වැනි ආණ්ඩුක‍්‍රම ව්‍යවස්ථා සංශෝධනය පූර්ණ වශයෙන් බලාත්මක කර දීමටයි අද අනුර දිසානායක ඇතුළු වත්මන් ජවිපෙ නායකත්වය සූදානම් වන්නේ

මේ අයගේ තුන්වන අරමුණ කුමක්ද? බැරි වෙලාවත් ‘විධායක ජනාධිපතික‍්‍රමය අහෝසි කිරීමේ 20 වැනි ආණ්ඩුක‍්‍රම ව්‍යවස්ථා සංශෝධනය’ සම්මත කර ගැනීමට නොහැකි වුවහොත් ඒ සටන් පාඨය, ඊනියා පොදු අපෙක්ෂකයකු ගෙන ඒමට යොදා ගැනීම තුන්වන අරමුණයි. නමුත් අපට විශ්වාසයි මේ රටේ ජනතාව මේ ජවිපෙ පටු අරමුණු ඉටු කර ගැනීමට ඉඩ නොදෙන බව. මේ රටේ ජනතාව ‘අටුවෙන් දුමට බහින්න’ සූදානම් නැහැ කියා ජවිපෙ දැන්වත් තේරුම් ගත යුතුයි. 2010, 2015 පොදු අපේක්‍ෂක නාඩගම් මගින් ජවිපෙ රටට කළ හානිය සුළුපටු නැහැ.

2015 හංස පූට්ටුවකින් ගෙනා පොදු අපේක්ෂකයා පසුගිය වසර තුන තුළ කළ විනාශය අපි අමුතුවෙන් කිය යුතු නැහැ. 13 වැනි ව්‍යවස්ථා සංශෝධනය බලාත්මකව තිබියදී විධායක ජනාධිපති ක‍්‍රමය අහෝසි කිරීමේ යෝජනාවක් ගෙන ඒමට ජවිපෙට සදාචාරත්මක අයිතියක් නැහැ. විධායක ජනාධිපති ක‍්‍රමය සහ 13 වැනි ව්‍යවස්ථා සංශෝධනය එකවර අහෝසි කිරීම තමයි ප‍්‍රායෝගික වන්නේ.

‘දැන්වත් ඉල්ලා අස්වෙන්න’

ඒ වගේම අපි අනුර දිසානායක මහත්තයාට කියනවා, ‘සදාචාරයක්, ලැජ්ජාවක් තියෙනවා නම් කරුණාකර විපක්‍ෂයේ ප‍්‍රධාන සංවිධායක ධුරයෙන් දැන්වත් ඉල්ලා අස්වෙන්න. මැයි 08 වැනිදා සිට සැබෑ විපක්‍ෂයේ මන්ත‍්‍රීවරු 70ක් අසුන්ගෙන සිටිය දී මන්ත‍්‍රී ධුර 06ක් තිබෙන ඔයාට ඔය තනතුරේ ඉන්න ලැජ්ජා නැද්ද?’ කියා.

අනුරුද්ධ බණ්ඩාර රණවාරණ
මාධ්‍ය ලේකම්
ජාතික නිදහස් පෙරමුණ



Leave a Reply

Your email address will not be published.

ප‍්‍රධාන පුවත්

​ඉන්දු – ලංකා ගිවිසුම නීති විරෝධියි… 13 වැනි සංශෝධනයෙන් ඊළමට පාර කැපීම සිදුවෙනවාමයි – අතිපූජ්‍ය ඕමාරේ කස්සප හිමියෝ පවසති (වීඩියෝ)

ඉන්දු - ලංකා ගිවිසුම නීති විරෝධී ගිවිසුමක් බවත්, ඒකීය රට ෆෙඩරල් කිරීම හරහා බෙදීමට කිසිසේත්ම ඉඩදිය නොහැකි බවත් මහා විහාර වංශික ශ්‍ය...


Read More

පාර්ලිමේන්තු මන්ත්‍රී උද්දික ප්‍රේමරත්නට වෙඩි ප්‍රහාරයක්

අනුරාධපුර දිස්ත්‍රික් පාර්ලිමේන්තු මන්ත්‍රී ජනප්‍රිය රංගන ශිල්පී උද්දික ප්‍රේමරත්න මහතාගේ මෝටර් රථයට කිසියම් ...


Read More

රජිව් ගාන්ධි ඝාතනයේ වරදකරුවන් යළි මෙරටට

රජිව් ගාන්ධි ඝාතනය සම්බන්ධයෙන් වරදකරුවන් වී දඬුවම් ලැබ සිට පසුව නිදහස ලැබූ ශ්‍රී ලාංකිකයන් 4 දෙනා නැවතත් ශ්‍රී ලංකාවට එවීමට...


Read More