කොළඹ වරායේ නැගෙනහිර පර්යන්තය (ජැටිය) සම්බන්ධයෙන් මතුව තිබෙන තත්ත්වය නිසා මේ වන විට ගෝඨාභය රාජපක්ෂ රජය බලයට පත් කිරීමට වෙහෙස වූ මිත‍්‍ර පක්ෂ බොහෝ සෙයින් කලබලයටත් කලකිරීමටත් පත්ව සිටී.

එදා මහින්ද රාජපක්ෂ මහතා සමයේ ඉදිකරනු ලැබූ හම්බන්තොට මාගම්පුර වරාය චීනයට විකිණීමේදී යහපාලන රජයට එරෙහිව කඳවුරැ බැඳගත් විවිධ පාර්ශ්වයන් වත්මන් පාලනය යටතේත් ඒ හා සමාන සටනක් කරන්න වේ යැයි හීනෙකින්වත් නොසිතන්නට ඇති බවට නම් සැක නැත.

එහෙත් මේ වන විට ජාතික බලවේග කරපිටින් ජනාධිපති ධුරයට පත්වූ ගෝඨාභය රාජපක්ෂ මහතා නැෙ`ගනහිර ජැටිය විකිණීමක් හෝ බදු දීමක් නොකරන බවත් එය ප‍්‍රතිශත වශයෙන් බෙදා වෙන් කිරීමක් පිළිබඳ කරනු ලද පැහැදිලි කිරීම ගැන උබතෝකෝටිකයක් නිර්මාණය වී ඇත.

ඒ අනුව ඉන්දියාවේ අදානි සමාගමට කොළඹ වරායේ නැගෙනහිර ජැටිය සංවර්ධනයට සියයට 49ක් හිමිවන බව ජනාධිපති සඳහන් කළේය. කවුද මේ ගෞතම් ශාන්තිලාල් අදානි. ඉන්දියානු කෝටිපති කර්මාන්තකරුවකු වන අදානි උපත ලැබූයේ 1962 ජුනි 24දාය. ඔහු ඉන්දියාවේ වරාය සංවර්ධනය හා මෙහෙයුම් කටයුතුවල නියැළී සිටින අහමදාබාද්හි බහුජාතික සමාගම් සමූහයක් වන අදානි සමූහයේ සභාපති සහ ආරම්භකයා වේ.

ඔහු 1988 දී අදානි සමූහය ආරම්භ කළ අතර ඔහුගේ ව්‍යාපාරය සම්පත්, සැපයුම්, බලශක්තිය, කෘෂිකර්මාන්තය, ආරක්ෂක සහ අභ්‍යවකාශය ආදී විවිධ ක්ෂේත‍්‍ර දක්වා විහිද පවතී. ජාත්‍යන්තර ෆෝබ්ස් සඟරාවට අනුව, ඔහුගේ පවුලේ ශුද්ධ වටිනාකම ඔක්තෝම්බර් වන විට ඇමෙරිකානු ඩොලර් බිලියන 25.2 ක් පමණ වනු ඇතැයි ගණන් බලා තිබේ.

2020 දී ඔහු ඉන්දියාවේ දෙවන ධනවත්ම පුද්ගලයා බවට පත්වන අතර, 2019 දී ඉන්දියා ටුඬේ විසින් ඉන්දියාවේ තුන්වන බලවත්ම පුද්ගලයා ලෙස ද නම් කරන ලදී. 2018 වන විට ඔහුට අදානි පෝර්ට්ස් ඇන්ඞ් සෙස් ලිමිටඞ් හි 66% ක කොටස්ද, අදානි එන්ටර්ප‍්‍රයිසස් හි 75% ක කොටස්ද, අදානි පවර් හි 73% ක කොටස්ද, අදානි සම්පේ‍්‍රෂණ සමාගමේ 75% ක කොටස්ද හිමිකර ගනිමින් ඉන්දීය ව්‍යාපාරික ජාලය ආක‍්‍රමණය කරන්නට විය. ගුජරාටයේ අහමදාබාද්හි ශාන්තිලාල් සහ ශාන්ති අදානිගේ ජෛන පවුලක උපත ලැබූ ඔහුට සහෝදර සහෝදරියන් 7 දෙනකු සිටින අතර ඔහුගේ පියා රෙදිපිළි වෙළෙන්දෙකි. ඔහු අධ්‍යාපනය ලැබුවේ අහමදාබාද්හි ෂෙත් චිමන්ලාල් නාගින්දාස් විද්‍යාලයෙන්ය. ඔහු ගුජරාට් විශ්වවිද්‍යාලයේ වාණිජවේදී උපාධිය සඳහා බඳවා ගත් නමුත් දෙවන වසරෙන් පසු එය අතහැර දැමීය. අදානි ව්‍යාපාර කෙරෙහි දැඩි උනන්දුවක් දැක්වූ නමුත් ඔහුගේ පියාගේ රෙදිපිළි ව්‍යාපාරය පිළිබඳව ඔහුට එතරම් කැමැත්තක් නොවීය. තරුණ අදානිගේ මුම්බායි වෙත ගොස් මහේන්ද්‍ර බ‍්‍රදර්ස් නම් දියමන්ති ආයතනයක මුලින්ම සේවය කළේය. මුම්බායි හි සැවේරි බසාර් හි තමන්ගේම දියමන්ති තැරැව්කාර සමාගමක් පිහිටුවීමට පෙර ඔහු වසර 2-3 ක් එහි සේවය කළේය. 1981 දී ඔහුගේ වැඩිමහල් සහෝදරයා වන මන්සුක්භායි අදානි අහමදාබාද්හි ප්ලාස්ටික් ඒකකයක් මිල දී ගෙන මෙහෙයුම් කළමනාකරණය කිරීමට ඔහුට ආරාධනා කළේය.

මෙම ව්‍යාපාරය පොලිවිවයිල් ක්ලෝරයිඞ් (පීවීසී) ආනයන හරහා ගෝලීය වෙළෙඳාමට පිවිසීමට දොරටුව බවට පත්කර ගත්තේය. 1985 දී ඔහු කුඩා පරිමාණ කර්මාන්ත සඳහා ප‍්‍රාථමික පොලිමර් ආනයනය කිරීම ආරම්භ කළේය. 1988 දී අදානි විසින් අදානි එන්ටර්ප‍්‍රයිසස් ලිමිටඞ් ආරම්භ කරන ලදී. එය අද අදානි එන්ටර්ප‍්‍රයිසස් ලිමිටඞ් ලෙස හැඳින්වේ. මුලදී සමාගම කෘෂිකාර්මික හා බලශක්ති වෙළෙඳ භාණ්ඩ සම්බන්ධයෙන් කටයුතු කළේය. 1991 දී ආර්ථික ලිහිල්කරණ ප‍්‍රතිපත්ති ඔහුගේ සමාගමට වාසිදායක වූ අතර ඔහු ව්‍යාපාර ලෝහ, රෙදිපිළි හා කෘෂි නිෂ්පාදන වෙළෙඳාමට ව්‍යාප්ත කිරීමට පටන් ගත්තේය. 1994 දී ගුජරාටි රජය මුන්ද්‍රා වරායේ කළමනාකරණ බාහිරින් ලබා ගන්නා බව නිවේදනය කළ අතර 1995 දී අදානි කොන්ත‍්‍රාත්තුව ලබා ගත්තේය.

1995 දී ඔහු පළමු ජැටිය සකස් කළේය. මුලින් ක‍්‍රියාත්මක වූයේ මුන්ද්‍රා වරාය සහ විශේෂ ආර්ථික කලාපය විසිනි. මෙහෙයුම් අදානි වරාය සහ සෙස් සමාගම වෙත මාරු කරන ලදී. අද වන විට සමාගම විශාලතම පුද්ගලික බහු වරාය ක‍්‍රියාකරු වේ. මුන්ද්‍රා වරාය ඉන්දියාවේ විශාලතම පුද්ගලික අංශයේ වරාය වන අතර වාර්ෂිකව භාණ්ඩ ටොන් මිලියන 210 කට ආසන්න ප‍්‍රමාණයක් හැසිරවීමේ හැකියාව ඇත.

1996 දී අදානි සමූහයේ බලශක්ති ව්‍යාපාර අංශය – අදානි පවර් ලිමිටඞ් ආරම්භ කරන ලද්දේ අදානි විසිනි. රටේ විශාලතම පුද්ගලික තාප විදුලිබල නිෂ්පාදකයා වන මෙගාවොට් 4620 ක ධාරිතාවයකින් යුත් තාප බලාගාර අදානි පවර් සතුව ඇත.

2006 දී අදානි විදුලිබල උත්පාදන ව්‍යාපාරයට අවතීර්ණ විය. 2009 සිට 2012 දක්වා ඔහු ඔස්ටේ‍්‍රලියාවේ ඇබට් පොයින්ට් වරාය සහ ක්වීන්ස්ලන්තයේ කර්මචයල් ගල් අඟුරු අත්පත් කර ගත්තේය.

ඩොලර් බිලියන 6 ක් වටිනා ඉන්දියානු සූර්ය බලශක්ති සංස්ථාව විසින් 2020 මැයි මාසයේදී අදානි ලොව විශාලතම සූර්ය ලංසුව දිනා ගත්තේය. මෙගාවොට් 8000 ක විදුලි වෝල්ටීයතා බලාගාර ව්‍යාපෘතිය අදානි ග‍්‍රීන් විසින් භාර ගනු ඇත. සහ අදානි සූර්ය විසින්
මෙගාවොට් 2000 ක අතිරේක සූර්ය කෝෂ සහ මොඩියුල නිෂ්පාදන ධාරිතාවයක් ස්ථාපිත කරනු ඇත.

ඔහු 1998 දී පැහැර ගැනීමකටද ලක්වන ඔහු 2008 මුම්බායි ප‍්‍රහාරයේදී ටජ් හෝටලයේ සිටියද මුළුතැන්ගෙයෙහි හා වැසිකිළියේ සැඟවී සිට දිවි ගලවා ගත්තේය.

2014 ඉන්දියාවේ ලෝක්සබා මැතිවරණය අතරතුර, අදානි විවිධ මතභේදයන්ට ලක්විය. භාරතීය ජනතා පක්ෂයේ නරේන්ද්‍ර මෝදිගේ මැතිවරණ ව්‍යාපාරය වෙනුවෙන් ඔහුට සහාය දුන් බවට චෝදනා එල්ල විය. තමාට මෝදි සමඟ විශේෂ අනුග‍්‍රහයක් නොමැති බවට ඔහුට ජාතික මාධ්‍යවල ප‍්‍රකාශ කරන්නට සිදු වුවද මෝදි අදානි සමූහයේ වරලත් ගුවන් යානාවලින් ඉන්දියාව පුරා ගමන් කරමින් මැතිවරණ ව්‍යාපාරයේ නිරත විය. විටෙක මෝදි රජය අදානිගේ ඩොලර් කෝටි 200 ක දඩයක් නිදහස් කිරීමෙන් ඔහුට ආර්ථික ශක්තියක් දෙන්නටද මෝදි අගමැති කි‍්‍රයා කළේය.

දේශපාලනමය වශයෙන් හිතවත් ව්‍යාපාරික අදානිට ඉන්දීය රජය පක්ෂපාතී වන විට මෙරට රජයද කොළඹ වරායේ නැගෙනහිර ජැටිය ලබාදී අදානි ළංකර ගැනීමට යෑම පිළිබඳ මෙරට තුළ නම් දැඩි සැක සංකා ඉපදී ඇති අතර ඉදිරියේදී මේ පිළිබඳ තත්ත්වය උණුසුම් නොවේ යැයි කියනු කාහට හැකි වන්නේද?

අකිත පෙරේරා