ඊයේ (01) දිනයේ දී අඛන්ඩව දෙවැනි දිනටත් කොළඹ කොටස් වෙළෙඳපොළ මිල දර්ශකයන් හි පහළ යාමක් දක්නට ලැබුණි. ඒ අනුව සියලු කොටස් මිල දර්ශක අගය ඒකක 101.0 කින් ඊයේ දිනයේ දී පහළ ගොස් දිනය අවසානයේ දී ඒකක 8,567.07 ක් ලෙසින් සටහන් වූ අතර එය පූර්ව ගනුදෙනු දිනය හා සැසඳීමේ දී 1.17% ක පහළ යාමක් බව පැවසේ. කොළඹ කොටස් වෙළෙඳ පොළේ සියළු කොටස් දර්ශකයන්ගේ දැවැන්ත මිළ පහළ යාමක් පසුගිය ජනවාරි 29 දිනයේ දී ද දක්නට ලැබුණි. එය ඒකක 143.94 ක දැවැන්ත පහළ යාමක් බව පැවසේ.
මේ අතර S&P SL20 දර්ශකය ද පෙර දිනයට සාපේක්ෂව ඒකක 75.03 කින් පහළ ගොස් ඒකක 3,439.15 ක් ලෙසින් සනිටුහන් වූ බව පැවසේ.

ඊයේ දිනය තුළ දැකිය හැකි වූ සුවිශේෂී සිදුවීම නම් රු. බිලියන 23.75 ක දැවැන්ත පිරිවැටුමක් දිනය තුළ දී වාර්තා වීමයි. ඒ සඳහා වැඩි දායකත්වය බ්‍රවුන්ස් ඉන්වෙස්ට්මන්ට්ස් පීඑල්සී ගිවිසාගනු ලැබූ (crossings) ගනුදෙනු කිහිපයක් හරහා ලැබී තිබුණි. එහිදී ගනුදෙනු 5 ක් හරහා කොටස් 2,634,352,470 ක් කොටසක් රු. 6.40 බැගින් හුවමාරු වී තිබුණු අතර රු. බිලියන 16.85 ක පිරිවැටුමක් එමගින් ජනනය වී තිබුණි. ඊයේ දින සාමාන්‍ය ගනුදෙනු තුළින් වැඩි දායකත්වයක් දෛනික පිරිවැටුමට ලැබී තිබුණේ LOLC හෝල්ඩිංග්ස් කොටස් ගනුදෙනු මගිනි. එය රු. බිලියන 1.37 කි.

ඊයේ දිනය තුළ දී සමාගම් 55 ක කොටස් මිල ගණන් ඉහළ යද්දී සමාගම් 153 ක කොටස් මිල ගණන් පහළ යන ලදී.