නලින් ද සිල්වා මහතාගේ ජාතික චින්තන මතවාදය හා බටහිර රටවල් විසින් පවත්වාගෙන යනු ලබන දැනුම් ආධිපත්‍යය පිළිබඳව එතුමා ‘කාලය’ වෙබ් අඩවිය ඔස්සේ පළ කරන ලිපිවල ඇති අදහස් පිළිබඳ නිර්දය විවේචනයක් විශේෂඥ වෛද්‍යවරුන් තිදෙනකු විසින් 2021 පෙබරවාරි මස 17 වන දා දිවයින බදාදා අතිරේකයේ පළ කර තිබුණි. එම ලිපියේ සඳහන් කරුණු කිසිදු තාර්කික පදනමක් මත පිහිටා විග‍්‍රහ කර නොමැති අතර බොහොමයක් කරුණු නලින් ද සිල්වා මහතා තමාගේ කිසිදු ලිපියක සඳහන් කර නොමැති ප‍්‍රලාප බව සාධක සහිතව පෙන්වා දීමට කැමැත්තෙමි. තවද බටහිර විද්‍යා දර්ශනයේ මෑත කාලීන ප‍්‍රවණතා අසූව දශකයේ සිට සිංහල පාඨකයනට හඳුන්වා දෙනු ලැබුයේ ද නලින් ද සිල්වා මහතා දිවයින බදාදා අතිරේකයේ පළ කළ ලිපි හා වාද ඔස්සේ බව මෙහිදී සිහි කළ යුතුය. විශේෂයෙන් බටහිර විද්‍යාවේ දර්ශනයට විප්ලවවාදී මතවාද හා සංකල්ප රාශියක් හඳුන්වා දුන් තෝමස් කූන්, ඉම්රේ ලැකටස් හා පෝල් ෆෙයරාබන්ඞ් වැනි දාර්ශනිකයන්ගේ මත පිළිබඳ දීර්ඝ විවාදයක් නලින් ද සිල්වා හා බර්ටි එස් නානායක්කාර යන මහතුන් අතර දිවයින බදාදා අතිරේකය ඔස්සේ මාස ගණනක් පැවැත්වුණි. මෙසේ රට තුළ ඉමහත් බුද්ධි ප‍්‍රබෝදයකට හේතු කාරක වූ නලින් ද සිල්වා මහතාගේ කෘතින් හා ලිපිලේඛන එක මිටට ගෙන විශේෂඥ වෛද්‍යවරුන් තිදෙනා විසින් කිසිදු විග‍්‍රහයක් නොමැතිවම එක් ලිපියක ෙඡ්ද දෙකකින් පමණ ඒවා සැහැල්ලූවට ලක් කිරීම බටහිර විද්‍යාවේ පදනම හා දර්ශනය පිළිබඳව එතුමන්ලාගේ දැනුමේ තරම මොනවට විදහා දක්වයි.
මම 1980 දශකයේ අග භාගයේ කොළඹ විශ්වවිද්‍යාලයේ විද්‍යා පීඨයේ සිසුවකු ලෙස නලින් ද සිල්වා ඇදුරුතුමාගෙන් ගණිතය ආශි‍්‍රත විෂයයන් සහ තාරකා භෞතික විද්‍යාව ඉගෙන ගතිමි. මීට අමතරව එවක එතුමාගේ අනුශාසකත්වය යටතේ පවත්වාගෙන ගිය ‘ගවේෂකයෝ’ සංවිධානය මගින් සතිපතා පැවැත්වූ එතුමාගේ දේශන හා සාකච්ඡුාවලට නිරතුරුවම සහභාගි වූයෙමි. එම සාකච්ඡුාවලදී බටහිර විද්‍යාවට අමතරව බටහිර දර්ශනය, බුදු දහම, මාක්ස්වාදය හා අපේ ගොවිතැන, වෙදකම, තාක්ෂණය ආදී දැනුම් පද්ධති පිළිබඳව අගනා දැනුම් සම්භාරයක් ලබා ගතිමි. මේ දැනුම් මගේ ලෝක දෘෂ්ටිය සකස් කර ගැනීමට බෙහෙවින් ඉවහල් වූ බව කෘතඥ පූර්වකව සඳහන් කරමි. පූජ්‍ය බෙංගමුවේ නාලක අනු නා හිමි හා මහාචාර්ය නලින් ද සිල්වා ඇතුළු තවත් දේශපේ‍්‍රමීන් කීපදෙනෙකුගේ මූලිකත්වයෙන් ආරම්භ කරන ලද චින්තන පර්ෂදය නමැති සංවිධානයට එහි මුල් කාලයේදීම බැඳුණු මම වර්තමානයේ එහි භාණ්ඩාගාරික තනතුර හොබවමි.
දැන් නැවතත් උක්ත ලිපිය දෙසට හැරෙමු. එම ලිපියේ මුල් කොටසේ මෙසේ සඳහන් වේ. ”මහාචාර්ය නලින් ද සිල්වා මහතා ඔහුගේ මතය කොළඹ විශ්විද්‍යාලයේ පැතිරවීම ආරම්භ කරන විට අපි වෛද්‍ය ශිෂ්‍යයෝ විමු. ‘මගේ ලෝකය’ නම් එතුමාගේ මුල් පොත ද විවිධ පුවත්පත් හා සඟරාවල පළවූ ලිපි ද එතුමා විසින් ප‍්‍රකාශයට පත් කරන ලද විවිධ පොත් ද අපි කියවා ඇත්තෙමු. ඒවායේ ඇති මත මීට වසර සියකට පමණ පෙර බටහිර දාර්ශනිකයන් විසින් පළ කරන මතවල අනුකරණ බව අපි ඒ දිනවල ම වටහා ගත්තෙමු.’’
එසේ නම් එකල නලින් දසිල්වා මහතාගේ මගේ ලෝකය කෘතියේ අඩංගු මත හා සංකල්ප පිළිබඳව කොළඹ, මොරටුව හා පේරාදෙණිය වැනි විශ්වවිද්‍යාලවලත්, පුවත්පත්වල ශාස්තී‍්‍රය අතිරේකවලත් පළ වූ වාද විවාදවලට ඔබතුමන්ලා ඉදිරිපත් නොවූයේ මන්ද? මෙම විවාද අතරින් මෙතුමන්ලාගේ ගුරුතුමකු වූ මහාචාර්ය කාලෝ ෆොන්සේකා සමග මහාචාර්ය නලින් ද සිල්වා සිදු කළ විවාද අතිශයින් ජනපි‍්‍රය විය. එම විවාදවලද. නලින් ද සිල්වා ඇදුරුතුමා විසින් මහාචාර්ය කාලෝ ෆෝන්සේකාගේ තර්ක හා මත නිශේධ කළ ආකාරය ඒවාට සහභාගි වූ අය හොඳින් දනිති. එතුමාගේ මගේ ලෝකය කෘතිය සහ වෙනත් ලිපිවලින් ක්වන්ටම් භෞතික විද්‍යාව විසින් බටහිර විද්‍යාවේ භෞතිකවාදී පදනම දෙදරවා ඇති ආකාරය පෙන්වා දී ඇත. එසේම එතුමා විසින් ක්වන්ටම් භෞතිකයට බෞද්ධයන්ගේ චතුස්කෝටික න්‍යාය ඇසුරින් විවරණයක් ඉදිරිපත් කර ඇත. එතුමාගේ මෙම මතවාද අභියෝගයට ලක් කරමින් දැනට පෙරටුගාමී පක්ෂයේ (එවකට ජනතා විමුක්ති පෙරමුණේ) නායකයෙකු වන පුබුදු ජාගොඩ මහතා විසින් ක්වොන්ටම් භෞතික විද්‍යාවට භෞතිකවාදී විවරණයක් ඇතුළත් කෘතියක් පළ කර තිබුණි. එසේම එම අවදියේ මහාචාර්ය කාලෝ ෆොන්සේකා ද සාමාජිකත්වය දැරූ හේතුවාදී සංගමයේ ප‍්‍රබලයෙකු විසින් නලින් ද සිල්වා මහතාගේ ‘මගේ ලෝකය’ කෘතියේ සඳහන් ඉහත කළ මතයන් විවේචනය කර තිබුණි. එහෙයින් ‘මගේ ලෝකය’ පිළිබඳව ප‍්‍රතිවාදී අදහස් දරන ඉහත සඳහන් මහතුන් දෙපළටත්, ඔවුන්ගේ මතවලට අනුකූලතාව දැක්වූ මහාචාර්ය කාලෝ ෆොන්සේකා මහතාටත් චින්තන පර්ෂදය විසින් සංවිධානය කරන ලද ප‍්‍රසිද්ධ විවාදයකට ආරාධනා කරන ලදී. එහෙත් විවාදයට සහභාගි වූයේ මහාචාර්ය කාලෝ ෆොන්සේකා මහතා පමණි. නලින් ද සිල්වා ඇදුරුතුමා සමග පැවති විවාදවලදී කෙතරම් ශාස්තී‍්‍රයව බැට කෑවත් තමන් විසින් පළ කරන ලද මත පිළිබඳව විවාදයකට ආරාධනය කළ විට ඊට ඉදිරිපත් වීමට තිබූ ධෛ්‍යයර්ය පිළිබඳව මම අභාවප‍්‍රාප්ත මහාචාර්ය කාලෝ ෆොන්සේකා මහතාට මගේ ප‍්‍රණාමය පුද කරමි. තවද මගේ ලෝකය කෘතිය පළ වී වසර විසිපහක් සැපිරීම නිමිත්තෙන් චින්තන පර්ෂදය විසින් 2011 වසරේදී එම කෘතිය පිළිබඳව ප‍්‍රසිද්ධ සම්මන්ත‍්‍රණයක් කොළඹ නව නගර ශාලාවේදී පවත්වන ලදී. එම සම්මන්ත‍්‍රණයේදී ආරාධිත දේශන දෙකෙන් එකක් පැවැත්වූයේ කොළඹ වෛද්‍ය පීඨයෙන් බිහිවූ විශේෂඥ වෛද්‍ය අරුණ මුණසිංහ මහතා ය. මෙරට තුළ ඉමහත් බුද්ධි ප‍්‍රමෝදයක් ඇති කළ නලින් ද සිල්වා මහතාගේ කෘතින්වල අඩංගු එක් මතයක් හෝ ඛණ්ඩනය කිරීමට මේ වසර තිහක පමණ කාලය තුළ කිසිවකු සමත් වී නැත. එසේ කර තිබේ නම් පෙන්වා දෙන ලෙස අභියෝග කරමි.
කරුණු මෙසේ තිබියදී වසර තිහකට පසුව මෙම විශේෂඥ වෛද්‍යවරුන් තිදෙනා අවදි වී ඇත්තේ එතුමන්ලාම සඳහන් කරන ‘නලින්වාදී මතය’ දරන්නන් වෛද්‍ය විද්‍යාව දෙසට සිය නෙත් හෙළා ඇති නිසා බව සඳහන් කර ඇත. මෙතුමන්ලා නොදැන සිටියාට නලින් ද සිල්වා මහතා කාලෝ ෆොන්සේකා මහතා සමග බටහිර වෛද්‍ය විද්‍යාව, ආයුර්වේදය හා සිංහල වෙදකම පිළිබඳව මොරටුව විශ්වවිද්‍යාලයේ සිදු කළ විවාදයේදී එතුමා කාලෝ ෆොන්සේකා මහතාගේ තර්ක නිශේධ කළ ආකාරය අපට තවමත් මතකය.
ලිපියේ ඉතිරි කොටස පුරාම ඔබතුමන්ලා නලින් දසිල්වා මහතා ප‍්‍රකාශ කළා යැයි කියන කරුණු එතුමාගේ කිසිම ලේඛනයක සඳහන් ව නොමැති බව පෙන්වා දීමට කැමැත්තෙමි. නිදසුන් කිහිපයක් සලකා බලමු. ”වෛද්‍ය විද්‍යාව පිළිබඳව ඕනෑම කෙනෙකු පවසන දෙයක් සත්‍යයක් විය හැකි බව ද ඒ සඳහා කපු මහතකු හෝ වඩු මහතකු හෝ වෛද්‍යවරයෙකු පවසන මතයන් එක සේ සත්‍යයන් ගතයුතු බව මහාචාර්ය ද සිල්වා මහතා ඔහුගේ ලිපියේ ඍජුවම ප‍්‍රකාශ කරයි.’’
”මෙම නලින්වාදී තර්කයට අනුව කිසියම් විෂයයක් හැදැරීම හෝ පුහුණුවක් ලැබීම හෝ ඒ පිළිබඳව සුදුසුකම් ලබා ගැනීම අවශ්‍ය නොවේ. එවන් විෂයයක් හැදැරූ හෝ සුදුසුකමක් ලැබූ හෝ පුහුණුවක් ලැබූ හෝ අයකු සහ එසේ නොලැබූ අයකු අතර කිසිදු වෙනසක් නොමැත’’
”මහාචාර්ය නලින් ද සිල්වා මහතාගේ මෙම මතය අති භයංකරය. වසර ගණනාවක් තිස්සේ ඔහු විසින් ලංකාවේ වපුරන ලද මෙම ‘නලින්වාදී’ මතය අද රට තුළ ඇති වී ඇති ව්‍යාකූලත්වයට දාර්ශනික පදනමක් සපයයි. මෙම මතයට අනුව ආර්ථික විද්‍යාව පිළිබඳ හසල දැනුමක් ඇත්තකු හා ඒ පිළිබඳව කිසිවක් නොදත්තකු අතර කිසිදු වෙනසක් නොමැත. පාලමක් සෑදීමේදී ඒ පිළිබඳව තම ඉගැනුමෙන්, සුදුසුකමින් හා පුහුණුවෙන් උපදෙස් දෙන ඉංජිනේරුවරයකු හා ඒ පාලම උඩින් ගමන් ගන්නා මගියකු අතර කිසිදු වෙනසක් නොමැත. පරිපාලනය උගත්තකු හා නූගත්තකු අතර වෙනසක් නොමැත. පරිසරවේදියකු හා පරිසරය විනාශ කරන්නකු අතර වෙනසක් නොමැත.’’
මෙවැනි සාවද්‍ය ප‍්‍රකාශ සඳහන් වන නලීන් ද සිල්වා මහතාගේ ලිපිවල මාතෘකා හෝ ඒවා පළ කළ දිනයන් සහිතව එම ලිපිවලින් උපුටා දක්වන ලෙස මම විශේෂඥ වෛද්‍යවරුන් තිදෙනාට අභියෝග කරමි.
සමහර තැනක කරුණු විකෘති කර හෝ වැරදි වටහා ගැනීම් සිදුවී ඇති බව පෙනේ.
නිදසුනක් ලෙස ”එතුමාගේ වචනවලින් පවසන අයුරින් ධම්මික වෙද මහතා බාසුන්නැහැ කෙනෙකුද කපුමහතෙකුද කාලි අම්මා සම්ම්‍යදෘෂ්ටිකද මිත්‍යා දෘෂ්ටිකද යන්න අපි බලන්නේ නැහැ.’’
මේ ප‍්‍රකාශය නම් සත්‍යය. මෙයින් කියවෙන්නේ කුමක්ද? මෙයින් කියවෙන්නේ යම් විෂයයක් අරභයා එම විෂයය පිළිබඳ විශේෂඥයකු ප‍්‍රකාශ කරන මත අභියෝගයකට ලක් කරමින් වඩුවකු කාර්මිකයකු ගොවියකු හෝ කොටින්ම කියතොත් සම්මත උගතකු නොවන සාමාන්‍ය පුද්ගලයකු තමන් විසින් සිතා බලා හෝ අත්දැකීමෙන් හෝ දෙවියන් භූතයන් වැනි මනුෂ්‍ය නොවන ප‍්‍රාණීන්ගෙන් හෝ ලබා ගත් දැනුමක් ඇසුරින් කරන ප‍්‍රකාශ සැලකිල්ලට ගත යුතු බවයි. එම පුද්ගලයාගේ වෘත්තිය හෝ සමාජ තත්ත්වය හෝ අදාළ නොවන බවයි. අපේ සිංහල සම්ප‍්‍රදායය අනුව අතීතයේ සිටි වියතුන් බොහෝ විට එක් ක්ෂේත‍්‍රයකට පමණක් සීමා වූ අය නොවේ. ඔවුහු ගොවිකම, වෙදකම, නක්ෂත‍්‍රය, මූර්ති ශිල්පය, චිත‍්‍ර ශිල්පය වැනි ක්ෂේත‍්‍ර ගණනාවක එකවර කුසලතා දැක්වූහ. යම් විෂයයක් පිළිබඳව මත ප‍්‍රකාශ කිරීම, විචාරයට ලක් කිරීම හා නියාමනය කිරීමේ ඇති අයිතිය අදාළ ක්ෂේත‍්‍රයේ විශේෂඥයනට පමණක් සීමා කිරීම බටහිර විද්‍යාවේ ඇති දුබලතාවක් වන උණිතවාදයේ ලක්ෂණයකි.
එසේම උක්ත ලිපියේදී නලින් ද සිල්වා මහතාගේ ජාතික චින්තන මතවාදය, එතුමාගේ වෙනත් මත හා ප‍්‍රවාද මෙරට උගතුන් කිසි විටෙකත් පිළි නොගත් බව සඳහන් ය. එහි අර්ධ සත්‍යයක් තිබේ. මෙරටේ උගතුන් බහුතරයක්ම අපට ලබා දෙන බටහිර අධ්‍යාපනයෙන් හිස් කුරුවල් කරගත් පිරිසක් බව ඔවුන් කරන කියන දේවලින් මනාව පැහැදිලි වෙයි. නලින් ද සිල්වා ඇදුරුතුමා කොළඹ විශ්වවිද්‍යාලයේදී ජාතික චින්තන මතවාදය තම දේශනවලදී සිසුනට ප‍්‍රකාශ කිරීම පිළිබඳව එවකට සිටි උපකුලපතිතුමා එතුමාගෙන් ප‍්‍රශ්න කරන ලදී. බටහිර දැනුම් සමඟ ඊට පදනම් වන බටහිර චින්තනයද තමා සිසුනට පෙන්වා දෙන බැවින් වෙනත් චින්තන මත පදනම් වූ දැනුම්ද විවිධ සංස්කෘතීන් තුළ බිහි වන බව පෙන්වා දීමේ අයිතිය තමනට ඇති බව එතුමා පිළිතුරු වශයෙන් උපකුලපතිතුමා හට පවසා ඇත.
මේ වන විට කොළඹ විශ්වවිද්‍යාලය තුළ ක‍්‍රියාත්මක වූ ස්වාධීන ශිෂ්‍ය සංගමය හා ජනතා විමුක්ති පෙරමුණේ ශිෂ්‍ය කණ්ඩායම අතර බිහිසුණු බල අරගලයක් පැවතිණි. මෙම මැර කණ්ඩායම් දෙකටම විරුද්ධව අභීතව මතවාදීව නැඟී සිටියේ නලින් ද සිල්වා මහතාගේ ජාතික චින්තන මතවාදයෙන් පෝෂණය වූ කොළඹ විද්‍යා පීඨ ශිෂ්‍ය සංගමයයි. ඉහත බිහිසුණු අරගලය හා එක්සත් ජාතික පක්ෂ රජයේ මර්දනයේ ප‍්‍රතිඵලයක් ලෙස සමස්ත විශ්වවිද්‍යාල පද්ධතියම වසර තුනක් පමණ කාලයකට අකර්මන්‍ය විය. අනතුරුව නැවතත් විශ්වවිද්‍යාල විවෘත කරන විට මුලින්ම විවෘත කළ හැකි වූයේද කොළඹ විශ්වවිද්‍යාලයේ විද්‍යා පීඨයයි.
තවද මෙම විශේෂඥ වෛද්‍යවරුන් තිදෙනාගේ උක්ත ලිපියට අනුව නලින් ද සිල්වා මහාතාගේ ජාතික චින්තන මතවාදය ලංකාව පුරා පැතිර යෑම ලංකාවේ ප‍්‍රගමණයට බලවත් හානියක් සිදු කොට ඇත මෙයට පිළිතුරු දිය යුතුමය.
කොළඹ විශ්වවිද්‍යාලයෙන් පහ කරනු ලැබූ නලින් ද සිල්වා මහතා වසර දහයක් පුරා පැවති නඩුවෙන් ජයග‍්‍රහණය කර නැවතත් කැලණිය විශ්වවිද්‍යාලයට බඳවා ගන්නා ලදී. එහිදී විද්‍යා පීඨයේ පීඨාධිපති ධුරයට පත් වූ එතුමාගේ අනුග‍්‍රහය යටතේ බටහිර වෛද්‍ය ක‍්‍රමයට හඳුනාගත නොහැකි වූ රජරට වකුගඩු රෝගයට හේතු සෙවීමට සිදු කළ පශ්චාත් උපාධි පර්යේෂණයේ ප‍්‍රතිඵල රට තුළ උණුසුම් සංවාදයක් ඇති කිරීමට සමත් විය. රජරට වකුගඩු රෝගයට කෘෂි රසායනවල ඇති ආසනික් වැනි උග‍්‍ර විෂ සහිත බැර ලෝහවල බලපෑම එම පර්යේෂණය මඟින් තහවුරු කරන ලදී. මෙම පර්යේෂණය බටහිර රටවල පවා අවධානයට පාත‍්‍ර විය. මෙහිදීද මෙරට විශ්වවිද්‍යාලවල මහාචාර්යවරු හා කෘෂි විද්‍යාඥයන් බහුතරයක් මෙම පර්යේෂණයට එරෙහිව බහුජාතික සමාගම් වෙනුවෙන් පෙනී සිටියහ.
උක්ත ලිපියේ කර්තෘන් වන විශේෂඥ වෛද්‍යවරුන්ගේ දැනගැනීම සඳහා ඔවුන්ගේ සෞඛ්‍ය ක්ෂේත‍්‍රයෙන්ම තවත් නිදසුනක් ගෙන හැර දක්වමි. සිරිමා බණ්ඩාරනායක අගමැතිණියගේ පාලන සමයේ ලංකාවට ඖෂධ ප‍්‍රතිපත්තියක් සකස් කිරීම ඖෂධවේදය පිළිබඳ මහාචාර්ය සේනක බිබිලේ මහතාට පවරන ලදී. එතුමා සම්පාදනය කළ ඖෂධ ප‍්‍රතිපත්තිය ලෝක සෞඛ්‍ය සංවිධානයේද ප‍්‍රශංසාවට ලක් විය. එතුමාගේ යෝජනාවල ප‍්‍රතිඵලයක් ලෙස රටපුරා රාජ්‍ය ඔසුසල් ඇති කිරීම හා මෙරට තුළම ඖෂධ නිෂ්පාදනය කිරීම සඳහා රාජ්‍ය ඖෂධ නීතිගත සංස්ථාව පිහිටුවීම නිසා එතෙක් බටහිර රටවල බහුජාතික ඖෂධ සමාගම් විසින් මෙරට ජනතාව සූරා කෑම බොහෝ දුරට පාලනය විය. එහෙත් එම අවස්ථාවේදී මෙරටේ බටහිර වෛද්‍යවරුන් සෑහෙන පිරිසක් මහාචාර්ය සේනක බිබිලේ මහතාගේ එවැනි ප‍්‍රතිපත්තිවලට එරෙහිව බහුජාතික සමාගම් වෙනුවෙන් ඉදිරියට පැමිණියහ. මෙවැනි නිදසුන්වලින් පැහැදිලි වන්නේ ලංකාවේ ප‍්‍රගමණයට හා සාමාන්‍ය ජනතාවගේ ශුභසිද්ධියට බාධා කරන්නේ මෙරටේ බහුතරයක් වන බටහිර ගැති උගතුන් විසින් බව නොවේද ?
මේ සම්බන්ධයෙන් වඩාත් ඵලදායී හා අර්ථවත් සංවාදයක් හෝ විවාදයක් කිරීමට නම් සම්මන්ත‍්‍රණ ශාලාවක එය සංවිධානය කළ යුතු වේ. නමුත් පවතින වසංගත රෝග තත්ත්වය යටතේ එවන්නකට ඉඩකඩ සීමිත බැවින්, ඕනෑම රජයේ හෝ පෞද්ගලික නාලිකාවක විවාදයක් සූදානම් කරන ලෙස විශේෂඥ වෛද්‍යවරු තිදෙනාගෙන් කාරුණිකව ඉල්ලමු. එසේ නොමැති නම් සමාජ ජාලා හෝ වෙනත් ක‍්‍රමවේදයකට අනුව වුව මේ විවාදය කිරීමට අප සූදානම් ය.
ආචාර්ය නිම්සිරි ජයතිලක
ඉන්දු - ලංකා ගිවිසුම නීති විරෝධී ගිවිසුමක් බවත්, ඒකීය රට ෆෙඩරල් කිරීම හරහා බෙදීමට කිසිසේත්ම ඉඩදිය නොහැකි බවත් මහා විහාර වංශික ශ්‍ය...
අනුරාධපුර දිස්ත්‍රික් පාර්ලිමේන්තු මන්ත්‍රී ජනප්‍රිය රංගන ශිල්පී උද්දික ප්‍රේමරත්න මහතාගේ මෝටර් රථයට කිසියම් ...
රජිව් ගාන්ධි ඝාතනය සම්බන්ධයෙන් වරදකරුවන් වී දඬුවම් ලැබ සිට පසුව නිදහස ලැබූ ශ්‍රී ලාංකිකයන් 4 දෙනා නැවතත් ශ්‍රී ලංකාවට එවීමට...