චීන රුසියානු සහයෝගීතා ගිවිසුමේ 20වන සංවත්සරය ඉතා ඉහලින් අගය කරමින් සිහිපත් කරන අතර ගිවිසුම යාවත්කාළීන කරමින් දෙරට අතර සහයෝගීතාවය වඩාත් වර්ධනය කරගැනීමට රුකුල් දෙන නව ගිවිසුමකට එළඹෙන බවත්; එය ජාත්‍යන්තර ස්ථාවරත්වය වර්ධනය කරමින්, ආරක්ෂා කරන නව පරිච්ඡේදයකට මඟපාදනු ඇති බවත් පසුගිය 05වන සිකුරාදා දින මාධ්‍ය හමුවක් අමතමින් චීන විදේශ ඇමති වැන්ග් යී නිවේදනය කළේය.

කොවිඩ් -19 වසංගතයට දෙරටම මුහුණ දුන් ආකාරය ප්‍රසංශනීය බව සඳහන් කළ ඔහු නව සන්ධිස්ථානයක් සනිටුහන් කරමින් සිදුවන මෙම නව ආරම්භය විසින් ලොව පුරා පැතිරයමින් පවතින “දේශපාළන වෛරසයන්” අතුගා දැමීමට දෙරට එක්ව ක්‍රියාකරනු ඇති බවත් පැවසීය.

ලෝකයේ අස්ථාවරත්වය වර්ධනය වන තරමටම චීන – රුසියානු සහයෝගීතාවයේ අවශ්‍යතාවය වර්ධනය වනු ඇති බවත් මෙම කඳවුරේ ශක්තිමත්භාවයේ වර්ධනය අපේක්ෂාවෙන් සිටින කඳවුරට හිතවත් රටවල් අන්‍යොන්‍යව උදව් කර ගනිමින් සහ ආරක්ෂා කරගනිමින් තම රටවල්වල ස්වෛරීත්වය, ජාතික ආරක්ෂාව වැනි තම රට ප්‍රමුඛව සංවේදී වන්නාවූ කරුණු කෙරෙහි වඩාත් සැළකිලිමත් වෙමින් නැඟී එන “දේදුනු විප්ළවයන්” පරාජය කරණු ඇති බවත් ඔහු ප්‍රකාශ කළේය.

චීනයේ සමුද්‍රීය සහ ගොඩබිම් ප්‍රවාහන වැඩ සටහන ( Belt and Road Initiative) දෙරට අතර ආර්ථික සහයෝගීතාවය වර්ධනය කරනවා මෙන්ම යුරෝ ආසියානු ආර්ථික එකමුතුව (Eurasian Economic Union) වඩාත් පුළුල් තලයකට ගෙන එන බවත් සඳහන් කළේය.

දෙරට අතර සහයෝගීතාවයේ වර්ධනය ඇමරිකාව නොරුස්සන බවත් ප්‍රජාතන්ත්‍රවාදය, මානව හිමිකම් පිළිබඳ වදන් හරඹ කරමින් ලොව අන් රටවල අභ්‍යන්තර කටයුතු වලට අතපොවන ඇමරිකාවේ උපාය මාර්ගය ලොව අස්ථාවරත්වය වඩාත් වර්ධනය කරණු ඇති බවටත් පෙන්වා දෙමින් ඇමරිකාවට එරෙහිව චෝදනා කර සිටියේය.
වැඩිදුර තොරතුරු පහත ලින්ක් එකෙන්
https://www.rt.com/news/517442-china-russia-color-revolution-cooperation/