ඉහත දැක්වෙන්නේ අද (26) දින සමාජ ජාල මාධ්‍ය ඔස්සේ සංසරණය වූ ඡායාරූපයකි. ඊජිප්පතුවේ සූවස් ඇළ හරස් කරමින් රැඳී තිබෙන දැවැන්ත නෞකාව එහා මෙහා කිරීමට අවශ්‍ය කරුණු කාරණා සකස් වීම මේ වන විට ලහිලහියේ සිදුවෙමින් පවතින අතර ඡායාරූපයේ සිටින එක්ස්කැවේටර් යන්ත්‍රයේ මෙහෙයුම්කරුවා, තායිවානයේ Evergreen Marine නැව් සමාගමට අයත් මෙම MV Ever Given නෞකාව චලනය කිරීමට අවශ්‍ය සහාය ලබා ගැනීම සඳහා ඇළ ඉවුර පාදන ආකාරය දැක්වේ. CNN පුවත් සේවය පවසන්නේ සූවස් ඇළ අධිකාරීන් සඳහන් කරන පරිදි නෞකාව චලනය කිරීම සඳහා ඇළ ඉවුරේ ඝන අඩි 706,000 ක වැලි ප්‍රමාණයක් ඉවත් කළ යුතු බවයි.

සූවස් ඇළ මුහුදු මාර්ගය 1869 දී විවෘත වන්නේ යුරෝපය හා ආසියාව අතර එතෙක් අප්‍රිකාව වටා ගිය මාර්ගය කෙටි කරමින් ලෝක වෙළෙඳාමේ නව පරිච්ඡේදයක් සනිටුහන් කරලමිනි. මේ වන විට ලෝක වෙළෙඳාමෙන් 12% ක ප්‍රමාණයක් එහා මෙහා යන්නේ මෙම සූවස් ඇළ හරහා යි.

එසේ පසුගිය 23 දා සූවස් ඇළ හරහා යාත්‍රා කරමින් තිබූ මීටර 400 ක දිගින් යුතු වූ මෙම දැවැන්ත නෞකාව ඇළේ ඉවුරු දෙක අතර හරහට රැඳී ඇත්තේ දැඩි සුළං පහරකට ගොදුරු වීමෙනි. කෙසේ වෙතත් මේ වන විට දින 3කට ආසන්න කාලයක් ගත වී ඇතත්, නෞකාව සුපුරුදු මාර්ගයට ගෙන ඒම ගැන කිසිදු යහපත් ආරංචි මාර්ගයක් මෙතෙක් ලැබී නැත.

2020 දී සූවස් ඇළ හරහා ටොන් බිලියන 1.17 ක ප්‍රමාණයක් සහිත නැව් 18,800 කට වැඩි ප්‍රමාණයක් ගමන් කර ඇත. එය සාමාන්‍යයෙන් දිනකට නැව් 51.5 කි. මේ අනුව එක් දිනක් මෙම ඇළ මාර්ගය අවහිර වීමෙන් ගෝලීය වෙළෙඳාමට සිදුවන බලපෑම කොපමණ දැයි සිතා ගත හැකිය.

සූවස් ඇළ අධිකාරියේ ජ්‍යෙෂ්ඨ නිලධාරියෙකු පවසන්නේ මේ වන විට වෙළෙඳ භාණ්ඩ හා තෙල් රැගත් නෞකා 160 ක් පමණ මෙලෙස අවහිර වී ඇති මුහුදු මාර්ගය පසුකිරීමට බලාපොරොත්තුවෙන් සිටින බවයි. සූවස් ඇළ අවහිරයට විකල්පයක් ලෙස ඇතැම් නැව් Cape Horn වටා ගමන් කිරීමට තීරණය කර ඇත. නමුත් International Chamber of Shipping පවසන්නේ ඔවුන්ට ඒ සඳහා සැතපුම් 3,800 ක් සහ දින 12 ක් දක්වා අමතර යාත්‍රා කාලයකට මුහුණ දීමට සිදුවන බවයි.

පවතින තත්ත්වය හේතුවෙන් බොරතෙල් නැව්ගත කිරීම සම්බන්ධයෙන් ගැටළුකාරීත්වයක් පැන නැගෙනු ඇතැයි සඳහන් වන අතර ජාත්‍යන්තර වෙළෙඳපොාළේ බොරතෙල් මිල 4% කින් ඉහළ යාමට ද මෙම සූවස් ඇඟ අවහිරය මේ වන විට හේතු වී තිබේ.

එබැවින් ඡායාරූපයේ සිටින එක්ස්කැවේටර් යන්ත්‍රය මෙහෙයවන පුද්ගලයාගේ දක්ෂතාවය මත ඉදිරි දින කිහිපය තුළ ගෝලීය වෙළෙඳාම රඳා පවතිනු ඇත.
(දෙරණ)