Aflatoxin නමැති විෂ වර්ගයක් අපේ කෑමවල තිබේ. මෙය පුස් විශේෂයකි. බඩ ඉරිඟු, රටකජු, කපු ඇට, කජු, හේසල්නට්, පොල් ඇතුළු කාබනික ද්‍රව්‍ය විශාල ප‍්‍රමාණයක විස සහිත මෙකී පුස් වර්ගය හට ගැනීමේ අවදානම ඇත. මේ පුස් විශේෂය ශරීරගත වූ විට අක්මා පිළිකා හට ගැනීමට ඉඩ තිබේ. අක්මා පිළිකාවක් හට ගැනීම වූ කලී මරණයට ඉතාම කෙටි සහ ඉක්මන් මාර්ගයක් විවෘත වීමකි. Aflatoxin අඩංගු පොල්තෙල් තොග දෙකක් හෝ ඊට වැඩි ගණනක් ශ්රී ලංකාවට ආනයනය කර ඇති බව පසුගියදා අපි දැන ගතිමු. එහෙත් පාඨකයිනි බිය නොවන්න, මේ රටේ වෙසෙන සාමාන්‍ය ජනයා වන අපි Aflatoxin පමණක් නොව පොටෑසියම් සයනයිඞ් ශරීරගත වුව ද මිය නොයන තත්ත්වයට අපගේ කුසවල් සාදාගෙන ඇත්තෙමු. අපේ ආමාශ මිලි මීටර් පහක් ඝනකම් වූ කැන්වස් රෙද්දෙන් සාදන ලද මලූ වැනි ය. අපගේ බඩවැල් මිලිමීටර් හතරක් ඝනකම් වූ රබර්වලින් සාදන ලද හෝස් පයිප්ප හා සමාන ය. මේ වන විට මේ මිහිපිට තිබෙන ඕනෑම කුණුගොඩක් අනුභව කර පණපිටින් සිටීමට හැකි තරම් දරුණු ජාතියක් බවට අපි පත්ව සිටිමු. විෂ සහිත පොල්තෙල් රට තුළට පැමිණීම සම්බන්ධයෙන් ආණ්ඩුව සහ ජනතාව මහත්සේ කලබලයට පත්ව ඇති නමුදු අපගේ ඇස්තමේන්තුවට අනුව එවැනි කිසිවක් සිදුවිය නොහැක. අප ලෙඩවනු ඇත්තේ වස බඩට නොගියොත් පමණි; කුණු අනුභව නොකළොත් පමණි.
කල් ඉකුත් වූ මේද වර්ග, රස කාරක, තිරිඟු පිටි සහ වර්ණක යොදාගෙන කේක්, පාන් සහ පේස්ටි‍්‍ර නිෂ්පාදනය කරන ෆුඞ් චේන් එකක් හෙවත් ආපන ශාලා ජාලයක්, මෙයට අවුරුද්දකට පමණ පෙර රජය විසින් වටලන ලදී. මේ සිද්ධියට ඉමහත් ප‍්‍රසිද්ධියක් ලැබිණ. එහෙත් එම ආපනශාලා ජාලයේ හිමිකරුවන් එම වැටලීම්වලින් කිසිසේත්ම කම්පනය වූයේ නැත. ඔවුන් එකම දවසක්වත් සිය ආපනශාලා ජාලය වසා දැමුවේ නැත. එම ආපනශාලාවල තිබූ කේක්, බිස්කට්, පාන් වැනි ආහාර ඉවත්කර ගත්තේත් නැත. සාමාන්‍යයෙන් මෙවැනි වැටලීමකින් පසු සිදුවිය යුත්තේ සමස්ත ආපනශාලා ජාලයම සීල් තැබීමය. එහෙත් ආණ්ඩුව විසින් සීල් තබන ලද්දේ ආපනශාලා ජාලයට අයත් මුළුතැන්ගෙය පමණි. එහි තිබූ කල් ඉකුත් වූ ආහාර වර්ගවල බර කිරන ලද්දේ කිලෝග‍්‍රෑම්වලින් නොව ටොන් වලිනි. මේ සිද්ධියේ වැරදිකරුවන්ට කවර දණ්ඩනයක් නියම කරන ලද්දේ ද යන්න අපි අදටත් නො දනිමු. මේ ආපනශාලා ජාලයෙන් ආහාර අනුභව කර කවුරුවත් ලෙඩ වූයේ නැත. එහි තේරුම කුමක්ද? අපේ කට කුණු කෑමට පුරුදු වී සිටින බවය. අපේ අක්මාව කුණු දිරවා ගන්නට පුරුදු වී ඇති බවය. adulterated food හෙවත් දූෂිත වූ ආහාර අපගේ ජාතික ආහාර වී තිබේ.
ශ්රී ලංකාව වූ කලී ආහාර සංස්කෘතියක් ඇති රටකි. පාරම්පරික සහල්, රසායනික පොහොර නොයෙදූ එළවළු සහ පලතුරු, පිරිසිදු මස් හෝ මාළුවලින් එම ආහාර සංස්කෘතිය නිර්මාණය වී තිබිණි. එහෙත් අද වන විට අපේ ආහාර සංස්කෘතිය අසංස්කෘතික වී ඇත. සත්ත්ව ආහාර සඳහා පමණක් සුදුසු ධාන්‍ය වර්ග ගබඩා කළ තැන් ආණ්ඩුව විසින් වටින් විට වටලනු ලැබේ. පණුවන් ගැසූ අල සහ ලූනු ගබඩාකර ඒවායේ පණුවන් පිසදමා විකුණන අවස්ථා රූපවාහිනියෙන් පෙන්වනු ලැබේ. පවිත‍්‍රකාරක යොදා නිදපවන සෝස් වර්ග මේ රටේ තිබේ. රෙදි ඩයි යොදා බීම වර්ග නිපදවන තැන් මේ රටේ තිබේ. ඕනෑම නරක දේකට යම්කිසි ප‍්‍රමිතියක් ඇතත් ශ්රී ලංකාවේ ඇති නරක දේ අන්තිම නරකය. කසිප්පු පෙරණ විට ගැල්වනයිස් කම්බි සහ යූරියා යෙදීම එවැනි අවස්ථාවකි. මේවා බීලාත් පණ පිටින් සිටින ජනයා අප අතර බහුලය. ඒ නිසා විස පොල්තෙල් ගැන කවුරුවත් කළබල විය යුතු නැත.
(2021 මාර්තු 28 දිවයින ඉරිදා සංග්‍රහය කතු වැකිය)
ඉන්දු - ලංකා ගිවිසුම නීති විරෝධී ගිවිසුමක් බවත්, ඒකීය රට ෆෙඩරල් කිරීම හරහා බෙදීමට කිසිසේත්ම ඉඩදිය නොහැකි බවත් මහා විහාර වංශික ශ්‍ය...
අනුරාධපුර දිස්ත්‍රික් පාර්ලිමේන්තු මන්ත්‍රී ජනප්‍රිය රංගන ශිල්පී උද්දික ප්‍රේමරත්න මහතාගේ මෝටර් රථයට කිසියම් ...
රජිව් ගාන්ධි ඝාතනය සම්බන්ධයෙන් වරදකරුවන් වී දඬුවම් ලැබ සිට පසුව නිදහස ලැබූ ශ්රී ලාංකිකයන් 4 දෙනා නැවතත් ශ්රී ලංකාවට එවීමට...