ණයකර නිකුතුවක් හරහා රු. බිලියන 20ක ප්‍රාග්ධනයක් සම්පාදනය කර ගැනීම සඳහා ලංකා විදුලිබල මණ්ඩලය විසින් ඉදිරිපත් කරන ලද අයදුම්පත කොළඹ කොටස් වෙළෙඳපොළ විසින් අනුමත කර තිබේ. මේ අනුව එකක් රු. 100 බැගින් වන පරිදි ජ්‍යෙෂ්ඨ, අනාරක්ෂිත, ලැයිස්තුගත, නිදහස් කළ හැකි, ශ්‍රේණිගත ණයකර මිලියන 100ක් මූලික අදියරේ දී නිකුත් කෙරෙන අතර ඒ සඳහා අධිදායකත්වයක් තිබුණහොත් තවත් ණයකර මිලියන 100ක් නිකුත් කිරීමට සැලසුම් කර ඇත.

මෙම නිකුතුව 2021 අප්‍රේල් 08 දින විවෘත කිරීමට නියමිත වේ.

මේ සම්බන්ධයෙන් අදහස් දක්වමින් කොළඹ කොටස් වෙළෙඳපොළ ප්‍රධාන විධායක නිලධාරී රජීව බණ්ඩාරනායක මහතා පැවසුවේ, ප්‍රාග්ධනය ඉහළ නැංවීමේ ඵලදායී හා කාර්යක්ෂම ප්‍රභවයක් ලෙස පෞද්ගලික හා රාජ්‍ය ආයතන විසින් කොටස් වෙළඳපොල කෙරෙහි තබා ඇති විශ්වාසය මෙමගින් නැවත වරක් පෙන්නුම් කරනු ලබන බවයි.

Fitch Ratings Lanka Limited විසින් නිකුත් කරන ලද AA-(lka) ශ්‍රේණිය මෙම ණයකර නිකුතුවට ලැබී ඇති අතර එම ආයතනය විසින්ම නිකුත් කරන ලද AA-(lka) with a Stable Outlook ශ්‍රේණිය ලංකා විදුලිබල මණ්ඩලයට හිමිව ඇත.
(දෙරණ)