විධායක ජනාධිපති ධූරය අහෝසි කිරීම සදහා ජනතා විමුක්ති පෙරමුණ විසින් ගෙන එන ලද යෝජනාව සම්බන්ධයෙන් ලබන බදාදා (30) දින ඒකාබද්ධ විපක්ෂයේ පක්ෂ නායකයින් රැස්ව තීරණයක් ගන්නා බව හිටපු ජනාධිපති මහින්ද රාජපක්ෂ මහතා ඊයේ (26) බළපිටියේදී ප්‍රකාශ කළේය.

මෙම යෝජනාව සැබෑ ලෙසම එන්නේ කොහෙන්ද යන්න සම්බන්ධයෙන්ද එහි සැබෑ වුවමනාව විධායක ජනාධිපති ක්‍රමය අහෝසි කිරීම පමණක්ද යන්න සම්බන්ධයෙන්ද මෙහිදී සොයා බලන බව හිටපු ජනාධිපතිවරයා අවධාරණය කළේය.

මහින්ද රාජපක්ෂ මහතා මෙසේද කීය.

විධායක ජනාධිපති ක්‍රමය අවසන් කරන්න ජනතා විමුක්ති පෙරමුණ ඊයේ (25) පනතක් ගෙනාවා. සමහර අය මේ ගැන නොයෙක් කතා කියනවා. මේවා කොහෙන්ද එන්නේ කියල අපි සොයා බලන්න ඕනෑ. මේ වෙලාවේ ගේන්නේ ඇයිද කියන එකත් සොයා බලන්න ඕනෑ. අපි ලබන බදාදා (30) දිනයේ ඒකාබද්ධ විපක්ෂයේ පක්ෂ නායකයින් රැස් වී මේ සම්බන්ධයෙන් සාකච්ඡා කර තීන්දුවක් ගන්නවා. මේ සම්බන්ධයෙන් අපි දීර්ඝ වශයෙන් කරුණු සොයා බලනවා. අපි සෑම විටම තීන්දු ගන්නේ රට ගැන හිතල යැයිද මහින්ද රාජපක්ෂ මහතා අවධාරණය කළේය.

– ජයකාන්ත ලියනගේ